قالامگەرلەر, باسپا وكىلدەرى مەن كىتاپحانا ۇجىمى قاتىسقان جيىندى اشىپ بەرگەن ۇلتتىق كىتاپحانا ديرەكتورى اسا باعالى ءارى قۇندى كىتاپتاردى تابىس ەتىپ وتىرعان «اتامۇرا» باسپاسىنىڭ باسشىلىعىنا العىسىن بىلدىرە كەلە, الداعى ارىپتەستىكتى نىعايتۋ ماسەلەسىنە توقتالدى.
القالى جيىندى جۇرگىزۋدىڭ تىزگىنىن العان «زەينوللا سانىك اتىنداعى مادەنيەت قورىنىڭ» اتقارۋشى ديرەكتورى, اقىن سەرىك قاليەۆ يگى شارانىڭ ماقساتىنا توقتالىپ, جىلدىڭ باسىن جاڭا باستاما, ونەگەلى ىسپەن باستاپ, ۇلتتىق كىتاپحانا قورىنا ارنايى سىي-سياپات اكەلىپ وتىرعان «اتامۇرا» كورپوراتسياسىنىڭ پرەزيدەنتى راقىمعالي قۇل-مۇحاممەدكە ءسوز كەزەگىن ۇسىندى. باسپا تاريحىنان از-كەم مالىمەت بەرىپ وتكەن راقىمعالي ابرار ۇلى ءوز ءسوزىن ەل تاۋەلسىزدىگىنىڭ العاشقى جىلدارىندا باستالعان ءوندىرىستىڭ بۇگىنگى بيىگى, جەتكەن جەتىستىكتەرى تۇرعىسىنداعى مالىمەتتەرمەن بايلانىستىردى. بۇگىندە «اتامۇرا» ونىمدەرى وقۋلىقتارمەن قاتار ەنتسيكلوپەديالىق جانە بالالارعا ارنالعان باسىلىمدار, انىقتامالىق, عىلىمي جانە عىلىمي-تانىمدىق ادەبيەتتەر, سوزدىكتەر, كوركەم پروزا مەن پوەزيا, كورنەكتى مەملەكەت جانە قوعام قايراتكەرلەرىنىڭ ەڭبەكتەرى, سونداي-اق پوليگرافيالىق ءونىمنىڭ بارلىق تۇرلەرىمەن تولىققان.
«اتامۇرا» كورپوراتسياسى «اتىراۋ», «قاراعاندى», «ماڭعىستاۋ», «اقمولا», «استانا» سىندى ايماقتىق ەنتسيكلوپەديالارمەن بىرگە بەلگىلى قازاق عالىمدارىنىڭ, جانە قوعام قايراتكەرلەرىنىڭ ەڭبەكتەرىن ساپالى شىعارۋى وتاندىق كىتاپ مادەنيەتىنىڭ ءىرى جەتىستىگىنە اينالدى. ەلىمىزدىڭ تۇڭعىش پرەزيدەنتى, ەلباسى ن.ءا. نازارباەۆتىڭ قازاق جانە ورىس تىلدەرىندەگى «عاسىرلار توعىسىندا», «تاريح تولقىنىندا», «سىندارلى ون جىل», «بەيبىتشىلىك كىندىگى», «ەۋرازيا جۇرەگىندە» اتتى كىتاپتارى, «اتامۇرا» كىتاپحاناسى» سەرياسىمەن 150-دان استام اقىن-جازۋشىلاردىڭ تۋىندىلارى, سونىمەن قاتار بالالار ادەبيەتىن قولداۋ, ناسيحاتتاۋ ماقساتىندا «اتامۇرا» مەكتەپ كىتاپحاناسى» سەرياسىمەن بۇلدىرشىندەرگە ارنالعان قازاق جانە ورىس تىلدەرىندەگى كوركەم بەزەندىرىلگەن كىتاپتار, ەرتەگىلەر, مەكتەپ جاسىنداعى بالالارعا ارنالعان تانىمدىق كىتاپشالار باسىلىپ شىقتى.
«اتامۇرا» باستاعان يگى ىسكە قولداۋ ءبىلدىرىپ, جۇرەكجاردى پىكىرلەرىمەن بولىسكەن جازۋشى قابدەش ءجۇمادىلوۆ, دۋلات يسابەكوۆ, مادەنيەتتانۋشى مۇرات اۋەزوۆ, ت.ب. كوركەم ادەبيەتتىڭ قوعامداعى ءرولى, قالامگەرلەردىڭ تۋىندىلارىن اۋدارۋ, تاراتۋ ماسەلەسىندەگى وزەكتى جايتتاردى دا ورتاعا سالدى.
ءىس-شاراعا كىتاپحانا وقىرماندارى, زيالى قاۋىم مەن باق وكىلدەرى قاتىستى.
الماتى
